Hugskot til handaverk og list:
Við ynskjum um góðar og tryggar korona-dagar.
Jákup
Góðu næmingar og foreldur
Fyrstu vikuna í hesi korona-tíðini, løgdu vit uppgávur á heimasíðuna til hvønn dagin.
Men okkum dámar betur skipanina vit hava nýtt hesa vikuna (brotnu tímatalvuna) og leggja tykkum tí hesa brotnu tímatalvu til komandi viku: Brotin tímatalva NS_v14_2020
Eru spurningar til uppgávurnar kunnu tit altíð senda teldupost ella sms – og sjálvsagt kunnu tit eisini ringja í skúlatíð.
Eldri bólkur møtti aftur á Teams í dag kl. 11 og vit eru aftur á Teams týsdagin 31. mars kl. 11.
Við bestu ynskjum um trygt og gott vikuskiftið
– og góða netskúlaviku.
Anna Marna, Bára og Jákup
Góðu næmingar og foreldur 🙂
Hvussu gongur við uppgávunum í brotnu tímatalvuni? Minnist til, at lærararnir eru tøkir, so eru spurningar kunnu tit altíð senda teldubræv ella sms. Sjálvsagt eru tit eisni vælkomin at ringja, í skúlatíð – tó kann henda, at lærararnir eru á fundi.
Anna Marna og Bára fara at ringja til tykkara, í forskúla og yngra bólki at vita hvussu gongur. Jákup og eldri bólkur fara at samskifta á Teams, kl. 13 í dag.
1) Eldri bólkur: Tit skulu bara tendra net-telduna (Chrome-book), logga á sum næmingur við NOLa1970, velja seinna skiljiblaðið og har logga á O365. Síðani velja tit álmanakkan og melda til fundin, ið eg havi boðið tykkum til. Hugsið um hvar tit eru stødd, tí eg fari at biðja tykkum tendra myndatólið á telduni, so øll síggja hvønn annan 🙂
2) Næmingar og foreldur kunnu taka O365 niður á telefon, teldu, teldil, ið tit sjálvi eiga, eins og víst verður til á hesi slóð. Hetta er ókeypis hjá øllum, ið hava O365-brúkara frá skúlanum. Ringið til Jákup (tlf. 217001), um tykkum tørvar hjálp at taka forritið niður.
Í gjár var lærarafundur á Teams og har avgjørdu vit, at brotna tímatalvan til komandi viku verður løgd á heimasíðuna eftir døgurða fríggjadagin.
Hendan skúlatíðin á netinum er nokkso løgin, men týdningarmikið er, at vit øll halda okkum til, ikki falla í fátt, men læra av ymsu avbjóðingunum.
Við vón um góða og trygga skúlatíð á netinum.
Lærararnir og fyrstilærarin.
Góðu næmingar
Ein heilsan frá Perlu, at henni eisini leingist eftir tykkum – og vónar, at tit ansa væl eftir tykkum sjálvum og hvørjum øðrum í hesi korona-tíð.
Góðu næmingar og foreldur
Vónandi gongur tykkum væl við brotnu tímatalvuni og uppgávunum hesa vikuna 🙂
Í barnaútvarpinum í morgun varð m.a. prátað við fakfólk, ið minti á, at børn hava tørv á í minsta lagi 60 minuttir rørslu um dagin. Samstundis sum tilráðingar eru at hava frástøðu, eigur eisini at verða havt í huga týdningin at verða uttandura. So… fríska luft og trygga frástøðu!
Tit hava í miðlunum hoyrt nógv um “Teams”, ið vit eisini fara at gera okkum royndir við. Tit kunnu fyrireika tykkum á hesi slóð.
Við bestu ynskjum
JavS
Góðu næmingar og foreldur 🙂
Heldur enn at leggja nýggjar uppgávur út hvønn dag, velja vit nú at leggja tykkum hesa brotnu tímatalva fyri viku 13 (23.-27mars 2020)..
Í komandi viku fara leiðslur og lærarar at gera fleiri royndir við “Teams, í O365”. Hetta verður síðani fyrst lagt til eldra bólk at royna seg við.
Við ynskjum um góða skúlaviku, har vit ansa væl eftir okkum sjálvum og hvørjum øðrum – minnist til at verða saman við frástøðu.
Bára, Anna Marna og Jákup
Fólkakirkjan hevur áður boðað frá, at ongar gudstænastur eru í kirkjunum kring landið vegna Covi-19. Hetta er galdandi til og við sunnudagin 29. mars.
Komandi sunnudag, sum er miðføstusunnudagur, verður tó ein gudstænasta í Havnar kirkju, dómkirkjuni. Tað verður Jógvan Fríðriksson, biskupur, sum prædikar. Gudstænastan er løgd til rættis í góðum samstarvi við Kringvarpið.
Gudstænastan verður uttan kirkjufólk. Kringvarpið sendir gudstænastuna í útvarpi og sjónvarpi sunnudagin kl. 11.00.
www.kvf.fo
Góðu næmingar og foreldur.
Landsstýrismaðurin í Undirvísingarmálum, hevur á tíðindafundi boðað, at skúlanir lata ikki upp aftur fyrr enn eftir páskir – 3. páskadag.
Við ynskjum um gott vikuskiftið.
Jákup av Skarði, fyrstilærari
Góðan morgun góðu næmingar – og foreldur 🙂
Nú er seinasti skúladagurin í hesi fyrstu “net-vikuni”.
Forskúli:
Lesið og roknið saman við børnunum. Lat barnið tekna eina mynd, ið “tekur samanum” hesa fyrstu net-vikuna.
Yngri bólkur:
Lesið 15 min. um dagin og roknið somuleiðis. Setið nøkur orð á hesa fyrstu net-vikuna: Hvussu dámdi tær at vera í skúla heima?, kundi okkurt verið øðrvísi/betri?
Eldri bólkur:
Takið samanum hesa fyrstu net-vikuna. Hyggið at heimasíðuni og eftirmetið tykkara egna arbeiðslag. Í komandi viku fara vit eisini at gera royndir á O365 – um tit ikki minnast brúkaranavn/loyniorð, mugu tit ringja til Jákup á tlf. 217001.
Øll:
Tó at boðini ikki eru greið, er mest sannlíkt, at vit ikki hittast fyrr enn eftir páskir. Tá hevði verið stuttligt at skipa eina framsýning við myndum við heitinum: “Skúladagarnir heima í korona-tíðini 2020”.
Kahoot í dag, 20. mars 2020: “Landalæra”
Eru spurningar? Skrivað ella ring til lærararnar.
Við ynskjum um góðan net-skúladag 🙂
– og gott vikuskiftið
Lærararnir og fyrstilærarin
Góðan morgun góðu næmingar – og foreldur 🙂
Hvussu gongur tykkum at loysa uppgávurnar? Verið vælkomin at skriva onkrar søgur um hesar dagarnar vit arbeiða heimanífrá. Tit kunnu eisini tekna onkra mynd um hvat tit gera heima.
Forskúli:
Lesið og roknið saman við børnunum.
Yngri bólkur:
Lesið 15 min. um dagin og roknið somuleiðis.
Eldri bólkur:
Í dag fara tit at sleppa at læna nýggja Chrome-book heim. Hetta verður í sambandi við eini roynd at nýta ymisk amboð á O365.
Øll:
Manglar tykkum lesibøkur, so er bara at siga Báru frá.
Kahoot í dag: Evropa
Eru spurningar? Skrivað ella ring til lærararnar.
Hava tit gloymt brúkaranavn/loyniorð til O365? Skriva til Jákup.
Góðan net-skúladag 🙂
Jákup av Skarði